សៀមរាប៖ ថ្ងៃអាទិត្យ ៨រោច ខែបុស្ស ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១១ ខែមករា ឆ្នាំ២០២៦ ឯកឧត្តម សួន សុម៉ាលីនអភិបាលនៃគណៈអភិបាលខេត្តព្រៃវែង តំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែងបាននាំយកអំណោយជាគ្រឿងឧបភោគបរិភោគ និងសម្ភារប្រេីប្រាស់ជូនដល់គ្រួសារវីរកងទ័ព និងជនភៀសសឹក ដែលកំពុងស្នាក់នៅវត្តជ្រោយនាងងួន ស្រុកស្រីស្នំខេត្តសៀមរាបចំនួន ២០០០គ្រួសារ។ ការផ្តល់គ្រឿងឧបភោគបរិភោគនេះ មានការចូលរួមពីតំណាងប្រតិភូរាជរដ្ឋាភិបាល ទទួលបន្ទុកជាប្រធានអគ្គនាយកកំពង់ផែស្វយ័តភ្នំពេញ និងជាប្រធានក្រុមការងារ រាជរដ្ឋាភិបាលចុះមូលដ្ឋានស្រុកព្រះស្តេច ខេត្តព្រៃវែងលោកស្រី ម៉ននី រង្សី អភិបាលរងខេត្តតំណាង ឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប ឯកឧត្តម ស៊ិនរុន សមាជិកក្រុមប្រឹក្សាខេត្តសៀមរាប ឯកឧត្តម លោកជំទាវ លោកលោកស្រីប្រតិភូ អមដំណើរ គណៈអភិបាលស្រុកស្រីស្នំនិងក្រុមការងារសម្របសម្រួលមណ្ឌលភៀសសឹក។
ការចែកជូនសម្ភារ គ្រឿងឧបភោគបរិភោគរួមមាន អង្ករ ២០ តោន មី ២.០០០ថង់ ទឹកសុទ្ធ ២.០០០ កេស ភេសជ្ជៈ ១.០០០ កេស ជូនដល់គ្រួសារវីរកងទ័ព និងជនភៀសឹកចំនួន២០០០គ្រួសារ ដោយមួយគ្រួសារទទួលបានអង្ករ ១០គីឡូក្រាម មី ២០កញ្ចប់ ទឹកសុទ្ធ ១កេស ភេសជ្ជៈ ១០០០កេស ឃីត (មុង ភួយ ខ្នើយ កន្ទេល) ២.០០០ កញ្ចប់ ត្រីខ ២.០០០យួរ និងអាវក្មេងតូច ៣៥០ឈុត ក្នុងនោះមួយគ្រួសារទទួលបានអង្ករ១០គីឡូ មី ២០កញ្ចប់ ទឹកសុទ្ធ ១ កេស ភេសជ្ជៈ កន្លះកេស ឃីត ១ កញ្ចប់ ត្រីខ ១យួរ។ ដោយឡែកអាវក្មេងតូច ៣៥០ឈុតត្រូវបានចែកជូនក្មេងៗដែលកំពុងស្នាក់នៅវត្តជ្រោយនាងងួន ស្រុកស្រីស្នំ ខេត្តសៀមរាប។
ក្នុងនាមរដ្ឋបាលខេត្តសៀមរាប សូមថ្លែងអំរណគុណយ៉ាងជ្រាលជ្រៅបំផុតចំពោះទឹកចិត្តដ៏ថ្លៃថ្លារបស់ឯកឧត្តមអភិសន្តិបណ្ឌិត សសុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធាន ក្រុមការងាររាជរដ្ឋាភិបាលចុះមូលដ្ឋានខេត្តព្រៃវែងដែលបាននាំយកគ្រឿងឧបភោគបរិភោគ និងសម្ភារប្រេីប្រាស់ផ្តល់ជូនក្រុមគ្រួសារវីរកងទ័ព និងបងប្អូនភៀសសឹកដោយទឹកចិត្តស្មោះសរក្នុងការរួបរួមជាតិខ្មែរជាធ្លុងមួយដោយស្មារតីខ្មែរជួយខ្មែរក្នុងគ្រាលំបាក៕
